వర్షం కోసం శునకానికే పూజలు.. అనంతపురంలో అసలేం జరుగుతోంది?

ఆకాశం వైపు చూస్తూ వర్షం కోసం ఎదురుచూస్తున్నారు.. కానీ చినుకు జాడ కనిపించకపోవడంతో చివరికి తమ పూర్వీకుల నాటి ఆచారాన్ని పాటించారు. అనంతపురం జిల్లా విడపనకల్లు మండలం కొట్టాలపల్లి గ్రామంలో వర్షాల కోసం గ్రామస్థులు ఓ శునకానికి ప్రత్యేక పూజలు నిర్వహించారు.

ఆ శునకాన్ని కాటమయ్యగా భావించి, పూలతో అలంకరించి కొబ్బరికాయ కొట్టి పూజలు చేశారు. అనంతరం దాన్ని గ్రామంలో ఊరేగించారు. ఆ తర్వాత పెళ్లి వేడుకను తలపించేలా పలు రకాల వంటకాలు తయారు చేసి చుట్టుపక్కల గ్రామాల ప్రజలకు సహపంక్తి భోజనాలు ఏర్పాటు చేశారు.

ఇక అసలు ఆసక్తికరమైన విషయం ఆ తర్వాత జరిగింది. పూజలు పూర్తయ్యాక శునకాన్ని ఒక చోట ఉంచి నీళ్లు ఇవ్వకుండా ఉంచారు. ఇలా చేస్తే వర్షాలు కురుస్తాయని గ్రామస్థుల నమ్మకం.

వర్షం కోసం ఇలాంటి ఆచారాలు అనంతపురానికే పరిమితం కాలేదు. రాష్ట్రంలోని మరికొన్ని ప్రాంతాల్లో కూడా వరుణుడిని ప్రసన్నం చేసుకోవడానికి యాగాలు, పూజలు, ప్రత్యేక ప్రార్థనలు నిర్వహిస్తున్నారు. సింహాచలంలో వరుణ యాగం నిర్వహించగా, చిత్తూరు జిల్లాలోని కొన్ని గ్రామాల్లో కూడా వర్షాల కోసం ప్రత్యేక పూజలు చేశారు.

అయితే కొట్టాలపల్లిలో జరిగిన ఈ ఆచారం ఇప్పుడు ఒక ప్రశ్నను ముందుకు తెచ్చింది.

ఇది మూఢనమ్మకమా? లేక తరతరాలుగా వస్తున్న గ్రామీణ సంప్రదాయమా?

వర్షం కోసం ఇలాంటి ఆచారాలు చేయడంపై మీ అభిప్రాయం ఏంటి? కామెంట్‌లో చెప్పండి.